Subay sa direktiba ni Governor Erico Aristotle C. Aumentado, si Mayor Pedro “Dodong” M. Literatus, Jr. nagpahibalo sa pagkansela sa tanang klase, publiko ug pribado, sa tanan nga lebel sa Munisipyo sa Loon karong Lunes, Nobyembre 3, 2025. Kini nga lakang gihimo aron masiguro ang kahapsay ug kaluwasan sa mga estudyante, magtutudlo, ug tanang kawani sa eskwelahan, ug aron andamon usab ang mga tunghaan isip posibleng evacuation centers kon mokusog ang epekto sa Bagyong Tino nga gilauman nga magdala ug kusog nga hangin ug daghang pag-ulan.
Ang LGU-Loon, pinaagi sa Municipal Disaster Risk Reduction and Management Office (MDRRMO), nagpadayon sa pagbantay sa dagan sa panahon ug sa pagpatuman sa mga lakang sa pagpangandam uban sa tanang barangay. Gihangyo ang tanang Loonanons nga magpabilin nga alerto, seguruhon ang kaluwasan sa tagsa-tagsa ka balay, ug sundon ang mga opisyal nga pahimangno gikan sa PAGASA, Probinsyal nga Gobyerno, ug sa Munisipyo sa Loon.
Mag-amping kanunay, mga Loonanon!